Di Şahidîyê De Dirustî û Edalet

Gelî ew ên îmân anîne! Ji bo Allah bi şahidîyeke adil heqîyê qaîm bikin (rakin pîya). Buxza/kîna we ya li hemberî qewmekî bila we ji edaletê nevegerîne. Dadwer bin/Adil bin! Lewre ev (adilbûn) nêzîktirê teqwayê ye. Ji Allah bitirsin û xwe biparêzin. Bêguman Allah, ji amelên ku hûn dikin agahdar e.

Gelî ew ên îmân anîne! Dema yek ji we kete ber mirinê, di dema amadekirina wesîyetê de bila ji we du kesên adil/dadwer şahidî bikin. Eger hûn di rewşa rêwîtîyê de bin û bikevin ber mirinê, du kesên ku ne ji we ne bikin şahid. Eger hûn der heqê (şahidîya) wan de bikevin gumanê, wan piştî nimêjê bisekinînin û bila bi sonda li ser navê Allah wiha bibêjin: “Eqrebayên me bin jî em qet sonda xwe bi tiştekî din naguherînin. Em şahidîya Allah naveşêrin. (Eger em veşêrin) wê gavê em ê bibin ji gunehkaran.”

Eger derkeve holê ku ew her du (şahid rast negotine an jî heqîyê veşartine û) bûne gunehkar, wê demê ji ew (waris û kes) ên nêzî mirî ku neheqî li wan hatîye kirin du kes bikevin şûna (şahidên derewîn) û wiha sond dixwin: “Em bi navê Allah sond dixwin ku şahidîya me ji şahidîya wan herduyan rasttir e. Em ji hedê neborîne. Nexwe helbet em ê bibûna ji zilimkaran.”

Ev (usûl/şêwe); ji bo we ya herî munasib e ku şahidîya xwe bikaribin pêk bînin û piştî sonda xwe şahid ji vê tirsê (emîn bibin) ku şahidî li wan bê vegerandin Ji Allah bitirsin û xwe biparêzin û guhdarê (gotinên) wî bin. Allah, koma fasiqan hîdayet nake.

Vegerin/bizivirin cem bavê xwe û wiha bibêjin: “Hê bavê me! Bêguman kurê te dizî kir. Em enceq ji tiştên dizanin re şahidîyê dikin. Em ne (ew ên piştperda bûyeran dizanin) hafizê xeybê ne.”

Dema ku mûddeta (iddeya) xwe qedandin êdî an bi xweşikahî li wan vegerin an jî bi qencî wan berdin. Ji nav xwe du şahidê dadwer/adil bigirin û şahidîya xwe ji bo Allah rasterast bikin. Ew ên îman bi Allah û bi roja axîretê anîne re bi vêya şîret tê dayîn. Her kî ji Allah bitirse û xwe biparêze wê (Allah jî) jê re rêyekî veke/rêderekî çêke.

Ew şahidîyên xwe rasterast pêk tînin.